Damian Gjiknuri, i cili ka marrë detyrën e Sekretarit të Organizimit të Zgjedhjeve në PS, i ka kaluar stafetën e drejtuesit politik të Qarkut Elbasan, ministrit të Shtetit për Pushtetin Vendor, Arbjan Mazniku.
I pranishëm në takimin me strukturat e PS-së të Qarkut ishte edhe Sekretari i Përgjithshëm socialist, Blendi Klosi.
Ky i fundit i ka shprehur mirënjohjen kolegut Damian Gjiknuri për punën e mrekullueshme që ai ka bërë në këtë Qark në zgjedhjet e vitit 2023, ku socialistët fituan të 7 bashkitë në këtë qark.
Ndërsa ministri Mazniku është shprehur mjaft entuziast dhe ka premtuar për të bërë më të mirën në të ardhmen.
“Jam i bindur se në pranverën e vitit të ardhshëm do të marrim një rezultat akoma më të mirë për Shqipërinë në Bashkimin Europian”, deklaroi Mazniku.
Damian Gjiknuri u shpreh se ndjehej krenar për sukseset e arritura në Qarkun e Elbasanit gjatë viteve të fundit.
Ai tha se kalimi i stafetës tek kolegu Arbjan Mazniku si drejtues Politik i Qarkut vjen në zbatim të vendimeve të marra në Asamblenë Kombëtare të Partisë Socialiste. Gjiknuri u shpreh besimplotë se eksperienca e ministrit Arbjan Mazniku dhe angazhimi në fushatat elektorale, me mbështetjen e plotë të të gjitha strukturave të familjes socialiste do të përkthehen në një tjetër fitore bindëse të Partisë Socialiste në Qarkun e Elbasanit dhe të gjithë Shqipërinë.
