“Nuk do t’ju duhen më paratë në vitin 2036”, parashikimi i Elon Musk

Shefi ekzekutiv i Teslas, Elon Musk, ka ndarë një parashikim ambicioz për të ardhmen e ekonomisë globale, duke sugjeruar se deri në vitin 2036 roli i parasë mund të ndryshojë ndjeshëm.

Sipas tij, përparimi i shpejtë i inteligjencës artificiale dhe zhvillimi i robotëve humanoidë mund të transformojnë mënyrën se si prodhohen dhe ofrohen mallrat e shërbimet.

“Për çfarë shërbejnë paratë? Për të siguruar ushqim, strehim, transport dhe argëtim,” është shprehur Musk, duke argumentuar se nëse robotët dhe sistemet e AI arrijnë të prodhojnë më shumë sesa kërkon konsumatori, atëherë nevoja për para mund të zbehet me kalimin e kohës.

Musk ka theksuar edhe më herët se inteligjenca artificiale dhe robotët do të kenë një rol vendimtar në ekonominë e së ardhmes. Ai beson se makinat autonome dhe robotët humanoidë do të marrin përsipër një pjesë të konsiderueshme të punëve fizike dhe industriale, duke rritur ndjeshëm kapacitetin e prodhimit.

Megjithatë, jo të gjithë ekspertët ndajnë të njëjtin optimizëm. Një pjesë e ekonomistëve dhe specialistëve të teknologjisë vlerësojnë se, edhe në një botë me automatizim të avancuar, do të mbeten sfida të rëndësishme si shpërndarja e pasurisë, pronësia mbi teknologjinë dhe qasja e njerëzve në burimet kryesore.

Deklaratat e Musk kanë rikthyer në qendër të diskutimeve pyetjen se si inteligjenca artificiale mund të ndikojë në sistemin ekonomik dhe nëse, në të ardhmen, paraja do të vazhdojë të ketë të njëjtin rol që ka sot.