Ndahet nga jeta ikona e hiteve të mëdha botërore

5

Këngëtarja e njohur uellsiane Bonnie Tyler, e famshme për hitet e pavdekshme si “Total Eclipse of the Heart”, “Holding Out for a Hero” dhe “It’s a Heartache”, ka ndërruar jetë në moshën 75-vjeçare.

Lajmi u bë me dije përmes një njoftimi zyrtar në faqen e saj të internetit, ku thuhej se diva e baladave rock vdiq gjatë natës në një spital në Portugali, si pasojë e një sëmundjeje për të cilën po trajtohej.

Në maj të këtij viti, artistja nga Skewen i Uellsit të Jugut u vendos në koma të induktuar pas një ndërhyrjeje urgjente kirurgjikale në zorrë, po në Portugali. Muajin e kaluar, zëdhënësi i saj konfirmoi se ajo kishte dalë nga koma, por mbetej në gjendje shumë të rëndë dhe në kujdes intensiv. Familja dhe ekipi i saj, të cilët u shprehën të thyera shpirtërisht nga kjo tragjedi, kanë kërkuar privatësi në këto momente të vështira.

Vdekja e Tyler ka sjellë reagime të shumta dhe pikëllim të thellë në vendlindjen e saj. Sekretarja e Uellsit, Jo Stevens, e cilësoi atë si një “ikonë të muzikës uellsiane, fituese të çmimeve Grammy dhe Brit, si dhe zërin e viteve të rinisë sime”. Ndërsa Kryeministri i Uellsit, Rhun ap Iorwerth, u shpreh thellësisht i trishtuar, duke e quajtur këngëtaren një “ikonë të vërtetë”.

Para ndarjes nga jeta, Tyler kishte planifikuar një sërë koncertesh, duke përfshirë performancën në Sunshine Festival në Worcester këtë verë, disa data në Evropë, si dhe një koncert të madh në Utilita Arena të Kardifit më 17 dhjetor. Mik i saj i ngushtë i familjes, muzikanti dhe prezantuesi Owen Money, u shpreh i shokuar për BBC-në, duke e kujtuar atë si një grua që e donte jashtëzakonisht jetën dhe që mbetej jashtëzakonisht e famshme dhe e dashur në mbarë Evropën.

E lindur me emrin Gaynor Hopkins, Tyler u rrit në një shtëpi sociale në Neath dhe u zbulua nga agjenti Roger Bell në një klub në Swansea. Ajo publikoi singllin e saj të parë “Lost in France” në vitin 1977. Po atë vit, balada e saj country-pop “It’s a Heartache” arriti vendin e katërt në toplistat britanike dhe vendin e tretë në Billboard Hot 100 në SHBA.

Hiti i saj më i madh, “Total Eclipse of the Heart”, erdhi në vitin 1983, duke kryesuar toplistat në të dyja anët e Atlantikut. Përmes këtij suksesi, ajo u bë personi i parë uellsian që arriti vendin e parë në SHBA. Kënga dramatike, e shkruar nga lirikanti i Meat Loaf, Jim Steinman, fillimisht titullohej “Vampires in Love”, pasi ishte krijuar për një version muzikor të “Nosferatu”.