Regjisori legjendar James Burrows vdes në moshën 85-vjeçare

2

Regjisori amerikan i televizionit dhe bashkëkrijuesi i serialit “Cheers”, James Burrows, ka ndërruar jetë në moshën 85-vjeçare, raportoi “Hello Canada”.

Burrows ishte një nga figurat më me ndikim, në historinë e televizionit amerikan, me një karrierë që shtrihet në disa dekada dhe me 11 çmime “Emmy” të fituara, një rekord që e rendit mes regjisorëve, më të vlerësuar të industrisë.

Jeta dhe karriera

I lindur në vitin 1940, Burrows u rrit në një familje të lidhur me artin skenik, pasi babai i tij ishte dramaturg dhe regjisor në Broadway.

Ai studioi në Fakultetin e Dramës në Universitetin Yale, ku u formua profesionalisht në regji dhe produksion televiziv.

Karrierën e nisi në vitet ’70, duke punuar në disa sitcom-e të njohura, përpara se të bëhej një nga emrat më të kërkuar të televizionit amerikan.

Kulmi i karrierës

Kulmi i tij erdhi me bashkëkrijimin dhe regjinë e serialit ikonë “Cheers”, një nga sitcom-et më të suksesshme në historinë e televizionit amerikan, i cili u shndërrua në fenomen kulturor dhe fitoi një numër të madh çmimesh.

Ai luajti një rol kyç edhe në krijimin dhe regjinë e disa prej serialeve më të njohura të dekadave të fundit, përfshirë:

“The Mary Tyler Moore Show”

“Taxi”

“Frasier”

“Will & Grace”

“Friends”

“3rd Rock from the Sun”

Stili i tij, i bazuar në dialog të shpejtë dhe komedi karakteresh, ndikoi fuqishëm në formësimin e sitcom-it modern amerikan.

Trashëgimia

Familja e tij njoftoi se Burrows u nda nga jeta i qetë, i rrethuar nga familjarët. Në deklaratë u theksua se përveç arritjeve profesionale, ai do të kujtohet për mirësinë, bujarinë dhe mbështetjen ndaj kolegëve të tij.

James Burrows la pas një trashëgimi të jashtëzakonshme në televizion, duke formësuar disa nga serialet më të dashura, të historisë moderne dhe duke ndikuar në shumë breza krijuesish. /atsh