Fushatë e orkestruar për të dëmtuar Barçën, nuk do të kenë sukses!

Presidenti i Barcelonës, Joan Laporta, dëshmoi në gjykatë të premten në lidhje me “Rastin Negreira”, skandalin që akuzon klubin katalanas se dyshohet se i ka paguar ryshfet ish-nënkryetarit të Komisionit të Arbitrazhit Spanjoll, Jose Maria Enrikez Negreira, dhe djalit të tij Javier gjatë mandatit të parë presidencial të Laportës.Para gjykatës, kreu i blaugranas dha versionin e tij, duke konfirmuar ekzistencën e raporteve: “Departamenti i sportit i mori këto analiza. Djali i Negreirës i përgatiti raportet. Ishte një mekanizëm që i parapriu presidencës sonë; ne e trashëguam atë. Më informuan se ekzistonte ky shërbim konsulence teknike për arbitrimin dhe vendosëm të vazhdonim të paguanim për të sepse besonim se shërbimi ishte i dobishëm për departamentin e sportit.”

Laporta u përpoq ta minimizonte aspektin financiar të çështjes, duke i vënë shifrat që dolën në kontekst: “U tha këtu se u paguan 7.3 milionë euro gjatë 18 viteve. Le t’i vendosim gjërat në kontekst. Nuk mendoj se është aq e shtrenjtë për këto shërbime, të cilat janë të rëndësishme dhe të dobishme për departamentin e sportit.”

Së fundmi, presidenti i hodhi poshtë akuzat, duke pretenduar ekzistencën e një konspiracioni mediatik dhe ligjor: “Është e qartë se kjo është një fushatë e orkestruar për të dëmtuar reputacionin e Barçës. Ata nuk do të kenë sukses në njollosjen e kësaj epoke të Barçës, e cila u bë një pikë referimi globale për mënyrën se si fitoi dhe si luajti”, raporton Sport.

PANORAMASPORT.AL