Gjykata pranë Kolegjit Zgjedhor nisi shqyrtimin e një kërkese të paraqitur nga Shkëlqim Shehu, kandidat për deputet nga partia ASHM – Partia Demokratike në Qarkun Kukës.
Shkëlqim Shehu ka kërkuar që të rinumërohen votat në njësinë zgjedhore nr. 9 në Tropojë, pas zgjedhjeve të mbajtura më 11 maj 2025. Ai pretendon se rezultati nuk përfaqëson vullnetin e vërtetë të qytetarëve dhe kërkon gjithashtu që të rishikohen votat e pavlefshme dhe të korrigjohet tabela përfundimtare e rezultatit zgjedhor.
Në këtë proces, pala tjetër është KQZ, i përfaqësuar nga Marisol Bardhi dhe Juneta Dumi.
Fillimisht, KAS kishte refuzuar ta shqyrtonte ankesën e Shehut, por ai vendosi t’i drejtohet Kolegjit Zgjedhor për të kërkuar drejtësi.
Megjithatë, për shkak të problemeve shëndetësore të kandidatit, gjykata pranoi kërkesën e tij për shtyrjen e seancës dhe njoftoi se shqyrtimi i çështjes do të vazhdojë më 18 qershor 2025, ora 14:00, pranë Gjykatës Administrative të Apelit në Tiranë.
