Sonte vonë sipas kohës të Maqedonisë, anëtarët e Kombeve të Bashkuara miratuan me shumicë të madhe një rezolutë që kërkonte një armëpushim të menjëhershëm në Gaza, lirimin e të gjithë pengjeve të mbajtura nga Hamasi dhe akses të pakufizuar humanitar për mbi dy milionë palestinezë që jetojnë në kushte katastrofike për shkak të ofensivës ushtarake izraelite. Kjo u raportua nga gazeta Le Monde me seli në Paris.
Asambleja e Përgjithshme e OKB-së me 193 anëtarë votoi 149 pro, 12 kundër dhe 19 abstenime. Maqedonia ishte midis abstenuesve, së bashku me Shqipërinë – të vetmet dy vende në rajon që nuk e mbështetën rezolutën. Rezultati i votimit u shoqërua me duartrokitje të forta.
Rezoluta, e hartuar nga Spanja, “dënon fuqimisht urinë e civilëve si një metodë lufte”. Ambasadori izraelit Danny Danon e kundërshtoi ashpër atë, duke e quajtur akuzën për shkaktimin e qëllimshëm të urisë “një shpifje gjaku”. Ai pretendoi se Izraeli po vazhdonte të ofronte ndihmë humanitare, pavarësisht raporteve nga terreni që dëshmonin të kundërtën.
Ekspertët dhe aktivistët e të drejtave të njeriut paralajmërojnë se situata humanitare në Gaza është alarmante – rreth dy milionë njerëz janë në prag të urisë nëse bllokada nuk hiqet dhe fushata ushtarake nuk ndalet.
Ashtu si rezoluta e dështuar së fundmi e Këshillit të Sigurimit, edhe kjo nuk e dënon sulmin e Hamasit të 7 tetorit 2023, i cili shkaktoi luftën aktuale. Dokumenti nuk përmend çarmatimin e Hamasit – një pikë që Shtetet e Bashkuara e kishin kërkuar.
Ambasadorja në detyrë e SHBA-së në OKB, Dorothy Shea, shprehu pakënaqësi me tekstin, duke vlerësuar se ai “i dërgon një mesazh të papranueshëm Hamasit dhe grupeve të tjera terroriste të mbështetura nga Irani – se ata mund të shpërblehen për dhunën, vjedhjen e ndihmës humanitare dhe sulmet nga zonat civile”.
