Një valë reagimesh ka përfshirë rrjetet sociale pasi influencerja e njohur The Wizard Liz (emri i vërtetë Liz Wizard) konfirmoi ndarjen me të fejuarin e saj, YouTuber-in Landon Nickerson, për shkak të tradhtisë, ndërkohë që ajo ndodhej në muajin e katërt të shtatzënisë.
Në një rrëfim të ndjerë të publikuar në Instagram, Liz zbuloi se lidhja e tyre kishte përfunduar, duke akuzuar Nickerson se kishte dërguar mesazhe të fshehta në Snapchat një gruaje tjetër.
Mesazhet, sipas saj, ishin zbuluar pasi gruaja tjetër i ishte drejtuar një shoqeje të Liz-it dhe kishte dhënë prova konkrete.
“Dukej si njeriu më besnik në botë… por doli se edhe më të mirët mashtrohen. Edhe The Wizard Liz u tradhtua”, shkroi ajo.
Sipas saj, ndonëse vetëm pak ditë më parë Nickerson kishte qenë në Londër dhe i kishte shprehur dashurinë me një libër të personalizuar, gjithçka u rrëzua në momentin kur ai zgjodhi të shkëmbente mesazhe me dikë tjetër, “dikë që s’i bënte aspak përshtypje”, siç u shpreh Liz.
Nickerson, nga ana e tij, pranoi gabimin përmes një reagimi në Instagram Story, ku theksoi se bëhej fjalë vetëm për “disa minuta mesazhesh” dhe shprehu pendesë për veprimin e tij.
Megjithatë, fansat dhe ndjekësit nuk e panë këtë si një gabim të vogël. Hashtaget #WizardLiz dhe #LandonNickerson u përhapën me shpejtësi në rrjetet si TikTok dhe X (ish-Twitter), ku shumë e përshkruan situatën si një “histori tmerri”. Shumë prej tyre e përgëzuan Liz-in për guximin, sinqeritetin dhe mesazhin fuqizues që përcolli.
Në një tjetër deklaratë prekëse, Liz njoftoi se do të shiste unazën e fejesës me vlerë 100 mijë dollarë dhe të ardhurat do t’i dhuronte për ndihmën e nënave beqare.
