Microsoft tha se nuk do të mbështesë më aplikacionet Office njohur si Microsoft 365 apps në Windows 10 në fund të vitit.
Mbështetja do të përfundojë ditën që mbaron edhe për vetë sistemin operativ Windows 10, konkretisht më 14 Tetor. Kështu bizneset dhe konsumatorët që përdorin Microsoft 365 apps në Windows 10 duhet të kalojnë në Windows 11 për të vijuar përdorimin normal të tyre.
“Microsoft 365 apps nuk do të mbështeten më në Windows 10 duke filluar prej datës 14 Tetor 2025. Për të përdorur aplikacionet në fjalë në pajisjen tuaj duhet të kaloni në Windows 11,” shkruante Microsoft përmes një postimi në blog.
Ndërsa mbështetja për aplikacionet Office në Windows 10 mbaron në Tetor, nuk do të thotë se ato do të ndalojnë së funksionuari.
Microsoft thekson se aplikacionet do të vijojnë të funksionojnë siç duhet edhe pasi mbështetja për Windows 10-ën të mbarojë, por përdoruesit mund të hasen me probleme të performancës dhe stabilitetit me kalimin e kohës.
Adoptimi i Windows 11-ës është ende larg Windows 10 dhe miliona kompjuterë thjeshtë nuk mund të kalojnë në sistemin operativ më të fundit për shkak të kërkesave strikte të harduerit të Microsoft.
Së fundi kompania mbylli derën e mbështetjes së harduerëve të vjetër duke theksuar se Trust Platform Module (TPM) 2.0 është i domosdoshëm për instalimin e Windows 11-ës. /PCWorld Albanian
