Është nënshkruar marrëveshja Shqipëri-Emiratet Arabe-Itali për investimin në lidhjen nënujore të rrjetit të shpërndarjes së energjisë në detin Adriatik, si edhe për investimet në rritjen e prodhimit nga burimet e rinovueshme në vendin tonë.
Kryeministri Edi Rama, në një postim në rrjetet sociale, u shpreh se tre shtetet janë bashkuar në një aleancë strategjike për energjinë e rinovueshme.
“Shqipëria🇦🇱Emiratet Arabe🇦🇪Italia🇮🇹 bashkohen në një aleancë strategjike për energjinë e rinovueshme / Nënshkruhet marrëveshja e investimit për lidhjen nënujore të rrjetit të shpërndarjes së energjisë me Italinë në detin Adriatik, si edhe për investimet në rritjen e prodhimit nga burimet e rinovueshme në Shqipëri🇦🇱🤝🇦🇪🤝🇮🇹”, shkruan Rama.
Gjatë fjalës së tij në Samitin “Abu Dhabi Sustainability Week”, Kryeministri tha se marrëveshja do të shërbejë për të rritur kapacitetin e Shqipërisë si një lojtar kyç në rajon, mbështetur në prodhimin e saj me 100 % energji të ripërtëritshme.
Në ceremoninë e nënshkrimit ishin të pranishëm kryeministri Rama, homologia italiane, Giorgia Meloni, Presidenti i Emirateve të Bashkuara Arabe Sheikh Mohamed bin Zayed, si dhe përfqësues të qeverive të vendeve përkatëse.
