Politikat e qeverisë së Mickoskit dhe DPMNE-së me të ashtuquajturat kosha, rezultuan të dështojnë plotësisht. Çmimet nuk kanë rënë, por për disa produkte janë rritur. “Shportat” sollën më shumë dëme për qytetarët. Vaji i ullirit, vezët, sheqeri, produktet e qumështit, bizelet, fasulet, thjerrëzat, gjithçka është më e shtrenjtë, reagojnë nga LSDM.
“Të dhënat e fundit nga Enti Shtetëror i Statistikave e konfirmojnë edhe një herë – çmimet po rriten, qytetarët kanë shpenzime jetese gjithnjë e më të larta dhe gjithnjë e më pak para në xhepat e tyre. Kostoja e jetesës në dhjetor 2024 është rritur me 4.4%, produktet bazë të jetës, pa të cilat nuk mund të imagjinohet shtëpia, janë rritur me 4.3%”, shtuan nga partia.
Sot përfundon “shporta e Vitit të Ri”, e cila ka nisur të aplikohet më 15 dhjetor. Kjo masë ka mbuluar mbi 1100 produkte të cilat janë reduktuar me 10 për qind.
