Postuar: Janar 6, 2025 | 8:31
Aventura iraniane e Sokol Cikalleshit ka përfunduar.
Sulmuesi u bashkua me klubin e Traktorit në fundin e muajit gusht dhe pas vetëm katër muajsh, ai është larguar nga klubi që gjendet në vendin e dytë në kampionat. Sipas mediave vendëse, Cikalleshi është larguar sepse nuk ka përmbushur pritshmëritë që drejtuesit e klubit kishin, duke qenë se ai mbërriti si një sulmues me eksperiencë që luante në Superligën turke.
Që prej ditëve të para të janarit, ish-sulmuesi i Kombëtares është një lojtar i lirë. Sa i përket statistikave, ai luajti në total 11 ndeshje me Traktorin. Në gjashtë ndeshje në kampionat, Cikalleshi nuk arriti të shënonte asnjë gol, por tundi rrjetën në një ndeshje Kupe, si edhe realizoi një tripletë në Championsin e Azisë.
Me katër gola dhe një asist mbyllet edhe aventura e kavajasit që në moshën 34-vjeçare do të kërkojë një tjetër skuadër dhe pse jo mund të jetë një alternativë e mirë edhe për kampionatin shqiptar, kampionat nga ku ai ka hedhur hapat e parë.
PANORAMASPORT.AL
