Një rrëshqitje e masivit të dheut ka ndodhur në fshatin Gurth-Spaç, njësia administrative Orosh, bashkia Mirditë. Incidenti është raportuar në faqen e përroit të Gurth-Spaçit, ku ndodhen edhe galeritë e një miniere.
Sipas grupit të punës së bashkisë Mirditë, rrëshqitja ka përmasa të konsiderueshme, me një gjatësi prej rreth 40 metrash dhe një thellësi prej 20 metrash, në koordinatat 41°54’57.1”N, 20°04’04.5”E.
Si pasojë e rrëshqitjes, përroi ka devijuar rrjedhën dhe është futur në galeritë e minierës, duke shkaktuar bllokimin e makinerive dhe kalimeve. Deri më tani, nuk raportohet për rrezik ndaj banesave, por janë evidentuar dëmtime të tokave bujqësore të banorëve të zonës.
Strukturat e Mbrojtjes Civile të bashkisë Mirditë janë duke rakorduar me grupin e punës në terren dhe ekipin inxhiniero-teknik të minierës për të përcaktuar masat e nevojshme që do të ndërmerren në vijim.
