Mbledhja e Komisionit Qendror të Zgjedhjeve (KQZ) ka dështuar të mbahet në mungesë të kuorumit.
Në këtë mbledhje ka qenë vetëm kryetari i KQZ-së Kreshnik Radoniqi, dhe anëtarët e KQZ-së nga radhët e partisë në pushtet, Sami Kurteshi e Alban Krasniqi.
Në këtë mbledhje në rend dite ka qenë edhe shqyrtimi i rekomandimit të sekretariatit të KQZ-së për shtyrjen e afatit për regjistrim të mërgatës deri më 29 dhjetor.
Krasniqi ka thënë se mungesa e anëtarëve të PDK-së , LDK-së dhe AAK-së lidhet me këtë çështje. “Ata edhe më herët kanë shfaqur kundërshtitë e tyre për çfarëdo shtyrje të afateve nga KQZ-ja për pjesëmarrjen e KQZ-së në procesin zgjedhor. Le të na tregojnë a i ka kapur barku a zemra … Kjo mungesë është e pandershme. Nuk mundemi për këtë çështje kaq të rëndësishme ta mbyllim këtë mbledhje”, ka theksuar ai.
Afati për regjistrim të mërgatës përfundon sot në orën 00:00.
Deri më tani janë 83 mijë votues nga mërgata që janë regjistruar.
