Postuar: Dhjetor 9, 2024 | 16:44
Fitorja 2-0 e Burrelit në transfertë ndaj Pogradecit, ka kthyer skuadrën e drejtuar nga Ditmar Bicaj në vendin e katërt në renditje, një pozitë të cilës i gëzohet trajneri i cili ka theksuar se me këtë kontingjent që kishte, ishte i lumtur, por priste disa ndërhyrje në merkato gjatë janarit.
“E dinim Forcën e Pogradecit për hir të se vërtetës, duke parë edhe barazimin që kanë marrë në transfertë ndaj Besës. 30 minutat e parë për hir të së vërtetës folën për Pogradecin, na rrezikuan seriozisht, kishin 3 episode. Kjo falë edhe vertikalizimeve që po bënin gjatë këtyre minutave, e kishim porositur ekipin gjatë javës. Por ishte edhe meritë e kundërshtarit. Sa i përket strategjisë, kishim ardhur me dy objektiva, barazimin dhe fitoren, se nuk donim të dilnim pa pikë nga transferta. Jam i kënaqur se morëm pikët, jam i kënaqur. Shohim para se kemi edhe dy ndeshje për të marrë maksimumin e pikëve.
Kjo puna e janarit është pak për të gjithë që shpresojmë të na vijë ndonjë dhuratë nga babagjyshi i Vitit të Ri. Por unë me 85% të kontingjentit jam shumë i kënaqur, kam djem fantastikë, profesionistë dhe janë besnikë të ideve të mia. Unë do ta ruaj grupin dhe shpresoj që të kishim dy ndërhyrje. Do të doja një sulmues që t’i bashkëngjitej Farrukut, po ashtu edhe ndonjë mesfushor të mirë qendre që të nxjerrim topin se dashje pa dashje kemi pak probleme”, tha Bicaj për RTSH pas ndeshjes.
PANORAMASPORT.AL
