Kryetari i Grupit Parlamentar të Partisë Demokratike ka reaguar pas përgjigjes së kryeministrit Edi Rama lidhur me akuzat për dosjen “Xibraka”.
Rama iu kundërpërgjigj Bardhit me një postim të gjatë në platformën X, duke hedhur poshtë pretendimet e opozitës. Ai tha se do t’i përgjigjet kërkesës së Gazment Bardhit për interpelancë vetëm pasi SPAK të marrë një vendim mbi akuzat e deputetit të PD-së, se vëllai i tij, Olsi Rama, është i përfshirë në trafik droge.
Me tone të ashpra, Rama akuzoi opozitën për shpifje dhe theksoi se do të largohej nga politika nëse akuzat ndaj vëllait të tij, Olsi Rama, rezultonin të vërteta.
Nga ana e tij, Bardhi tha se përgjigja e Ramës nuk ishte një përgjigje ndaj tij, por një mesazh i pastër shantazhi ndaj SPAK, që të mbyllte hetimet për Olsi Ramën dhe dosjen “Xibraka”.
Bardhi theksoi se vazhdimi i hetimeve dhe zbardhja e plotë e të vërtetës mund të rrezikonte postin e Ramës si kryeministër. Ai shkruajti në Facebook: “Qëndrimi i Ramës, gjoja më drejtohej mua, por në të vërtetë ishte një mesazh i qartë dhe i pastër shantazhi ndaj SPAK, që të mbyllte hetimet ndaj Olsi Ramës dhe dosjes ‘Xibraka’. Vijimi i hetimeve dhe zbulimi i të vërtetës mund të rrezikojnë karrigen e Kryeministrit, pasi ai do të detyrohej të largohej nga politika.”
Bardhi e cilësoi mesazhin e Ramës si një formë shantazhi kriminal dhe shtoi se ky nuk mund të fshihej duke u përfshirë ai në një replikë pa kuptim dhe të sajuar.
Reagimi i plotë i Bardhit:
“Në përgjigje të interesit të medias lidhur me një qëndrim të Edi Ramës sot ndaj meje, ju bëj me dije sa më poshtë:
Nuk kam reaguar ndaj qëndrimit të Edi Ramës, sepse qartësisht qëndrimi i tij gjoja më drejtohej mua, por në të vërtetë ishte një mesazh i qartë dhe i pastër shantazhi ndaj SPAK që të mbyll hetimet ndaj Olsi Ramës dhe Dosjes “Xibraka”, sepse vijimi i hetimeve dhe zbulimi deri në fund i të vërtetës, i rrezikon Edi Ramës karrigen e Kryeministrit, sepse ai do të detyrohej të largohej nga politika!
Mesazhi i pastër kriminal e shantazhues ndaj SPAK nuk mund të përcillet kurrë duke bërë gjoja replikë publike me mua dhe as nuk mund të fshihet duke u përfshirë unë në një replikë pa sens e jashtë kohe, të sajuar nga hiçi dhe me shkaqe të inskenuara.
A nuk ishte po ky Edi Rama që hyri me sy, por doli me faqe të zezë, përpara disa muajve kur ishte në interpelancë për mbetjet toksike me denoncuesin e Olsit, pra me mua, me të njëjtin? Pse atëherë mendonte se kishte edhe sy edhe faqe për të ardhur në interpelancë, ndërsa sot ka humbur sytë dhe faqen?
Asokohe nuk ishte “kusht mbi Kushtetutën” as vëllai Ols dhe as përfundimi i hetimeve ndaj vëllait Ols nga SPAK. Vallë çfarë ndryshoi sot? Pse u kujtua beftë për vëlla Olsin dhe SPAK-un? Pse u kujtua që i rrezikohet pushteti nëse vijojnë hetimet e zbulohet e vërteta që u tentua të varrosej në 2018? Çfarë e pickoi sot Edi Ramën për këtë çështje? Pse ka frikë Edi Rama nga hetimi, dhe kërkon mbylljen e shpejtë të çështjes, përpara se të humbi zgjedhjet e Majit 2025?
E di që Edi Rama nuk e ka për gjë të grisë Kushtetutën dhe Ligjin për pushtetin e tij personal. E di shumë mirë që do të gjejë çdo justifikim për të mos u përballur në Parlament me krimin e vjedhjes që u ka bërë shqiptarëve. E di shumë mirë që edhe mesazhet politike i jep sipas stilit mafioz. E di që po bën çmos të shantazhojë edhe SPAK-un që t’i mbyllë hetimet për Olsin dhe kokainën e Xibrakës. Ajo që s’kisha parashikuar ishte që të fshihej pas të vëllait të vogël për të mos ardhur në Parlament.
Të keqpërdorësh familjen për të mos dhënë llogari para shqiptarëve, do të thotë të jesh në pozicion shumë të sikletshëm. Dhe e kuptoj që fshihet pas Olsit! Sa më shumë zbardhen kodet pin në SKY/EÇ, por shumë shpejt edhe këto të rejat në MATRIX, aq më shumë do të fshihet Edi Rama!
Le të fshihet në rrjetet sociale sa të dojë, të bëjë teatër sa të dojë, të inskenojë reagime nga hiçi për të përcjellë mesazhe publike kriminale për SPAK sa të dojë, e sigurojë se, me SPAK apo pa SPAK, largimin nga politika do ta ketë me turp, të shpejtë, dhe ashtu siç e meriton një frikacak që i fshihet Kuvendit, një bashkëpunëtor i bandave që ka torturuar, vjedhur e varfëruar bashkëqytetarët e tij.”
Kujtojmë se më datë 28 Mars të këtij viti Gazment Bardhi Olsi Ramën, vëllain e kryeministrit Edi Rama, si të përfshirë në çështjen e organizatës kriminale të Xibrakës.
Bardhi publikoi atë ditë disa dokumente të prokurorisë, ku përfshirja e Olsi Ramës sipas tij është lënë pa emër, por sipas tij është identifikuar makina që ai përdori.
