Jasir Asani erdhi nga banka rezervë për të lënë gjurmë te Gwangju në duelin ndaj Shanghai Shenhuas të mërkurën, duke shënuar gol me prekjen e parë të topit. Goli i sulmuesit të Shqipërisë në minutën e 57-të doli të jetë vendimtar në fitoren e Gwangjut, ndërsa për të ishte goli i shtatë i edicionit aktual të Ligës së Kampionëve të Azisë.
“Dëshiroj që ta shtyj veten të bëhem golashënuesi më i mirë i Ligës së Kampionëve të Azisë”, thotë Asani në intervistën dhënë për faqen zyrtare të Konfederatës së Futbollit të Azisë.
“Natyrisht, futbollisti më i mirë i garës është Ronaldo, i cili shënoi dy gola këtë javë. Ai më jep motivim për të synuar trofeun e golashënuesit më të mirë. Dua të jap gjithçka për skuadrën sepse e meriton, njësoj siç e meriton edhe trajneri. Kjo është hera e parë që Gwangju po merr pjesë në këtë garë dhe shpresoj ta arrijmë këtë nivel çdo vit. Pa bashkëlojtarët do të ishte shumë e vështirë të shënoja. Dua t’i falënderoj të gjithë për këtë fitore”.
Trajneri Lee Jung-Hyo është shprehur krenar për paraqitjen e ekipit, por ka theksuar se ekipi duhet të jetë edhe më i saktë para portës.
“Kemi krijuar shumë shanse por nuk kemi arritur t’i konvertojmë në gola. Kjo është një pjesë e fushës ku ne duhet të përmirësohemi. Por ne e kemi treguar futbollin e Gwangjut. Duhet të fokusohemi e të përmirësohemi në shënimin e më shumë golave. Të gjithë kanë përgjegjësi në përfaqësimin e ekipit dhe jam krenar për përkushtimin e tyre. Disa lojtarë duhet të shfaqin edhe më shumë kur ju jepet mundësia të luajnë. Gjithçka që unë bëj është për ekipin dhe lojtarët”, është shprehur trajneri i Gwangjut, Lee Jung-Hyo.
Për Shanghai Shenhuan, skuadrën e elitës së futbollit kinez, ka qenë një tjetër ndeshje për të cilën trajneri Leonid Slutskiy, ka pasur shumë kritika.
Ai ka thënë se ekipi që e drejton nuk e pati intensitetin e duhur.
“Ishte ditë e vështirë për ne. Nuk luajtëm shpejtë dhe lëvizjet tona ishin të ngadalshme. Ne kemi qenë gjithmonë një hap prapa, në çdo aksion. Ekipi kundërshtar luajti më mirë dhe padyshim se e meritoi fitoren”, ka thënë Slutskiy.
“Kemi luajtur nivel tjetër të futbollit sa i përket shpejtësisë. Nëse je i ngadalshëm dhe nuk lufton për topin e dytë, nuk ka rëndësi se çfarë taktike përdor. Kur nuk luan shpesh, e humb ritmin dhe kjo është shumë e rrezikshme. Lojtarët ishin shumë të nervozuar dhe nuk e kuptova me të vërtetë situatën. Ndeshjen e ardhshme e luajmë në shtëpi, por e dimë se do të jetë vështirë për t’i marrë pikët e plota. Megjithatë, ne po ashtu e kuptojmë se nuk kemi tjetër zgjidhje, përveç se të provojmë”.
Gwangju ndeshjen e ardhshme e luan ndaj një tjetër skuadre kineze, atë kundër Shanghai Port FC, të martën.
Ndërkohë, Shanghai Shenhua ballafaqohet me Ulsan HD FC të Republikës së Koresë.
Asani realizoi “hat-trick” në fitoren 7:3 ndaj Yokohamas së Japonisë në xhiron e parë. Gwangju fitoi më pas 1:0 ndaj Kawasaki Frontale të Japonisë, po ashtu me gol të Asanit. Në xhiron e tretë shënoi dy herë ndaj Johor Darul Ta’zim të Malajzisë, në fitoren 3:1. Të mërkurën ishte goli i radhës për të. Pra, ka shënuar gola në të gjitha katër fitoret e skuadrës nga Koreja e Jugut.
Cristiano Ronaldo në Championsin aziatik i ka katër gola në total.
Nga pesë gola i kanë Anderson Lopes i Yokohamas dhe Matias Vargas i Shanghait.
Me fitoren e mesjavës, Gwangju është në vendin e dytë me 12 pikë, ndërsa Vissel Kobe nga Japonia e udhëheq grupin e Lindjes me 13 pikë. Në këtë grup janë 12 skuadra nga Japonia, Koreja e Jugut, Kina, Tajlanda, Australia dhe Malajzia.
Në grupin e Perëndimit janë skuadrat nga Arabia Saudite, Katari, Emiratet e Bashkuara Arabe, Irani, Uzbekistani dhe Iraku.
The post I inspiruar nga Ronaldo, Asani synon suksesin në “Champions” appeared first on KosovaNews.
