ÇFARË MUNGOI NË FINALE! Publiku vë re “gabimin” e produksionit pas shpalljes së fitueses
Finalja e Big Brother VIP Albania u mbyll mes emocionesh të forta, ku Selina arriti të triumfojë përballë Mirit dhe të rrëmbejë çmimin e madh.
Megjithatë, mes festës dhe lotëve të gëzimit, një detaj i rëndësishëm nuk i shpëtoi vëmendjes së publikut.
Bëhet fjalë për mungesën e një prej ritualeve më simbolike të këtij formati: fikja e dritave të shtëpisë nga fituesi.
Në edicionet e mëparshme, ky moment ka qenë gjithmonë pjesë e finales, ku fituesi mbetet i fundit në shtëpi dhe mbyll gjithçka duke fikur dritat – një akt që simbolizon fundin e rrugëtimit.
Por këtë herë, për habinë e të gjithëve, kjo skenë nuk u realizua.
Mungesa e këtij momenti ka ndezur menjëherë reagime në rrjetet sociale, ku shumë ndjekës janë shprehur se prisnin këtë “vulë” finale.
Për shumë prej tyre, fikja e dritave nga vetë fituesja do të kishte qenë mbyllja perfekte e këtij sezoni.
