Drejtuesit e Bayern Munich kanë nisur bisedimet për rinovimin e kontratës me Harry Kane.
Kontrata aktuale e sulmuesit anglez skadon në qershor të vitit 2027, ndërsa klubi bavarez synon ta mbajë atë në “Allianz Arena” edhe për disa sezone të tjera.
Sipas burimeve pranë klubit gjerman, Bayern i ka propozuar Kane zgjatjen e kontratës deri në verën e vitit 2028 ose 2029. Raportohet se ka optimizëm nga të dyja palët për arritjen e një marrëveshjeje të re, duke pasur parasysh rëndësinë që anglezi ka në projektin sportiv të skuadrës.
Zyrtarizimi i marrëveshjes pritet të ndodhë në javët në vijim, ndërsa negociatat po zhvillohen në një klimë pozitive.
32 vjeçari iu bashkua Bayern-it pas largimit nga Tottenham dhe aktualisht po zhvillon sezonin e tij të tretë me kampionët e Gjermanisë. Sulmuesi anglez ka qenë një nga figurat kyçe të bavarezëve, duke u shndërruar në liderin e repartit ofensiv.
Në këtë sezon, Kane ka realizuar 21 gola dhe ka dhënë 4 asistime, shifra që justifikojnë plotësisht dëshirën e drejtuesve të Bayern Munich për ta mbajtur atë sa më gjatë në skuadër.
