“I pazëvendësueshëm për Anglinë”, Uejn Runi zbulon pasuesin ideal të Herri Kejnit për shiritin e kapitenit

Ish-sulmuesi ikonik i Mançester Junajtid, Uejn Runi i cili ka mbajtur edhe për 3 vite rresht shiritin e kapitenit te Anglia, ka vlerësuar maksimalisht mesfushorin e Arsenalit, Deklan Rajs. Ai u shpreh se Rajs duhet të jetë pasuesi i Herri Kejnit në momentin që ky i fundit do të varë këpucët në gozhdë.

“Për mua, ai është personi që ndoshta po pret që Herri Kejn të varë këpucët në gozhdë në një moment. Ai ishte kudo në fushë kundër Evertonit. Vendimet e tij, kur dhe ku ta pasonte topin, me cilën këmbë, preciziteti i pasimit… ishte një kënaqësi për t’u parë. Ai është lojtari i duhur për të zëvendësuar Kejn sipas mendimit tim, për shkak të vendosmërisë dhe personalitetit të tij. Të gjithë duket se e duan, ata që e njohin, ata që janë afër tij. Ai është i pazëvendësueshëm për Anglinë”, deklaroi Runi për BBC Sport.

PANORAMASPORT.AL