Presidentja e Republikës së Kosovës, Vjosa Osmani, ka zhvilluar një audiencë private me Papa Leonin XIV në Selinë e Shenjtë, takim që ajo e ka cilësuar si një nder të veçantë për Kosovën.
“Audienca private me Papa Leonin XIV në Selinë e Shenjtë ishte një nder i veçantë.”
Gjatë takimit, Presidentja Osmani i ka përcjellë Atit të Shenjtë urimet më të përzemërta me rastin e fillimit të misionit të tij, si dhe shpresën që pontifikati i tij të sjellë dritë, kurajë dhe mbështetje për njerëzit në nevojë në mbarë botën.
“Gjatë takimit i përcolla sërish urimet më të përzemërta për fillimin e misionit të tij, si dhe shpresën që pontifikati i tij të sjellë dritë, kurajë dhe mbështetje për njerëzit në nevojë anembanë botës.”
Presidentja Osmani ka përcjellë gjithashtu ftesën zyrtare për një vizitë të Papa Leonit XIV në Republikën e Kosovës, duke theksuar se një vizitë e tillë do të pritej me shumë dashamirësi nga qytetarët e vendit.
“Përcolla poashtu ftesën e përzemërt për një vizitë të tij në Republikën e Kosovës, e cila do të pritej me shumë dashamirësi nga të gjithë qytetarët tanë.”
Në kuadër të bisedës, u diskutua edhe për rolin e Kosovës si vend që ka ndërtuar paqe dhe harmoni ndërfetare, si dhe për mundësitë e thellimit të bashkëpunimit me Selinë e Shenjtë.
“Biseduam për rolin e Kosovës, tokës sonë dardane, si vend që ka ndërtuar paqe dhe harmoni ndërfetare mbi përvojën e saj historike të qëndresës dhe sakrificës.”
Presidentja Osmani theksoi rëndësinë e bashkëpunimit në fusha që lidhen drejtpërdrejt me mirëqenien e qytetarëve dhe shprehu shpresën për njohjen formale të Republikës së Kosovës nga Selia e Shenjtë.
“Diskutuam gjithashtu për thellimin e bashkëpunimit në fusha që prekin drejtpërdrejt mirëqenien e qytetarëve tanë, me shpresën që Selia e Shenjtë do të marrë së shpejti vendimin e shumëpritur për njohjen formale të Republikës së Kosovës.”
Në përmbyllje, Presidentja Osmani ritheksoi përkushtimin e Kosovës për forcimin e marrëdhënieve me Selinë e Shenjtë dhe avancimin e miqësisë historike, duke ndarë mesazhe paqeje dhe harmonie me rastin e festës së Krishtlindjes.
“Kosova mbetet e përkushtuar t’i forcojë marrëdhëniet me Selinë e Shenjtë dhe ta avancojë miqësinë tonë historike, duke u udhëhequr nga vlerat që na bashkojnë. Në frymën e festës së Krishtlindjes, ndamë dëshirat e përbashkëta për paqe e harmoni në gjithë botën.”
