Postuar: Gusht 25, 2025 | 19:10
Rubin Hebaj është kthyer në një nga golashënuesit më të njohur në futbollin në Uzbekistan. Sulmuesi i cili ka fituar titull kampion në Superiore me Partizanin e Teutën, por edhe në Maqedoninë e Veriut me Shkëndijën e Tetovës, tashmë është pjesë e Sogdiana dhe po ndihmon këtë skuadër që të synojë objektiva madhorë.
Sot në ndeshjen e Kupës ndaj Navbahor Namagan, ai ishte protagonisti kryesor i sfidës. I aktivizuar si zakonisht nga minuta e parë, Hebaj u gjend në vendin e duhur në momentin e duhur për të shënuar golin e avantazhit për ekipin e tij.
Në minutën e 56-të, skena u përsërit, me Hebajn që tregoi se është një gjahtar zone duke dyfishuar shifrat për ekipin e tij e duke bërë thuajse formalitet kualifikimin.
SHIH VIDEON
Avantazhi i dyfishtë bëri që trajneri më pas ta zëvendësonte sulmuesin shkodran, ndërsa ekipi i Sogdiana shënoi edhe dy herë të tjera në minutat e fundit për të mbyllur ndeshjen me fitoren 4-0 dhe kalimin në turin tjetër në Kupë.
PANORAMASPORT.AL
