Ish-kryeministri Sali Berisha në takim me demokratët dhe qytetarët e Lushnjes u shpreh se deputetët e opozitës në parlament kanë nisur një betejë të drejtë, pasi po i mohohen të drejtat kushtetuese.
Berisha tha se kjo betejë është për gjithë shqiptarët, për rivendosjen e pluralizmit dhe dmeokracisë. Sipas tij kësaj beteje duhet t’i bashkohen të gjithë qytetarët pasi bëhet fjalë për të ardhmen e tyre dhe fëmijët e tyre.
Ish-kryeministri shtoi se Rama është rreziku më i madh që i kanoset shqiptarëve pas Enver Hoxhës.
Sali Berisha: Jemi forca politke që do përmbysim këtë diktaturë. Asgjë në botë nuk na pengon në misionin tonë për të përmbysur diktaturën e bandave në Shqipëri. Është koha jonë, është e guximit tonë. E mbrojtjes së idealeve tona. Është prova e mbrojtjes së interesit kombëtar e mbrojtjes së fëmijëve tanë. Kësaj prove nuk i shmangemi. Ne do qëndrojmë. Në këtë provë për kauzën tonë të drejtë për kauzën e drejtë të çdo shqiptari që beson në pluralizmin. Ne do fitojmë. Kjo provë kërkon sakrifica, kërkon guxim. Ju kujtoj këtu se midis të gjitha formave të diktaturave, diktatura e bandës është diktatura më e zezë, më e keqe. Beteja është jo e lehtë. Ka nevojë për shembullin e secilit prej jush. E nisëm në parlament, pa kthim, se do mbrojmë të drejtat tuaja. Nuk tërhiqemi. Ai është akti i një grupi deputetësh të cilët vendosën të qëndrojnë në emër tuaj, për të shpëtuar pluralizmin. Secili pre jush të marrë një vendim të tillë. Të bëjmë gjithçka për të shpëtuar Lushnjen, Shqipërinë, demokracinë. Rama është rreziku më i madh për shqiptarët pas Enver Hoxhës. Do ngrihemi fuqishëm në një betejë pa kthim, në një betejë në emër te shpresës, të demokracisë, në një betejë që ne do fitojmë.
